Ассаламу Iалайкум!

Суна хьа сайт йойзина цхьа шиъ-кхоъ бен де дац, дукх пайдехь хIума хии суна. Дела рез хийл хьуна, тха хаттаршна жоп даларна.

Са цхьа хаттар дара хьоьга. Суна цхьана хьехамехь хезнер, зудчо шен цIийн-дега хатта ца хотташ, цунгар пурба ца доьхуш неха бер дакхор чIогI во ду аьлла. Къемат дийнахь и санна йолу зуда накхах хьала тесна жоьжагIатехь кхазор ю аьлла. Цунах лецна хIу эр дар ахь, и мел бакъ ду? ДжазакаллахIу хайран.

БисмиллахIиррохьманиррохьим

Ва Iалайкум ассалам ва рохьматуллахIи ва баракатухI!

Iелам-наха билгалдина ду шайн жайнашкахь, зудчо шен цIийна-дегара пурба а доцуш, мехах нехан бер дакхо мегаш ца хилар, ткъа мегаш доцу хIума къилахь хIума ду.

Цуьнан бахьана, Iелам-наха дийцарехь, цу зудчуьнан ерриге хан шен хIусам-деца йоьзна ю, цундела, цуьнан пурба доцуш и хан кхидолчу гIулкхана хьажо мегар яц.[1]

Ткъа цара аьллачу оцу бахьане хьаьжча вайна билгалдо́лу, кхузахь лууш дерг цкъа-шозза бер дакхор дац, масала цхьанхьа цхьа гIуллакх тIеIоттаделла, ца дакхийча ца долуш хьал делахь. Муххале а, цигахь лууш дерг масийттозза бер дакхор ду, хIорозза а дакхош хан оьшур йолчу кепара. Цигара схьа аьлла Iелам-наха, нагахь санна цIийнада цхьанхьа кхечу махка вахана цIахь вацахь, тIаккха мегар ду иза аьлла.[2]

Цул совнаха, цхьаболчу Iелам-наха кхин бахьана а хьахийна цунна: хууш ма-хиллара, шен билламаш кхочуш хуьлучу кепара хийра бер дакхийча, и бер и дакхийна йолчу зудчуьнан бер санна хуьлу. Ткъа и хIума майрачунна ца хууш дар нийса ца хуьлу.

Амма иштта бер дакхийна йолу зудчунна хир долчух лаьцна ахь хьахийна дерг – цу хьокъехь дийцина хьадис суна девзаш дац, йа иза иштта ду аьлла Iелам-наха хьахош а гина дац.

Ткъа дика хуург АллахI ву!