Хаттар:

Ассаламу Iалайкум! Ламаз карахь доцуш Къуран деша мегий? Масала, дIавижале ас сайн дагахь, Къуран схьа ца оьцуш Аль-Мульк сурат дешахь карахь ламаз доцуш, муха хира ду иза? Къа летара-м дац суна? Ткъа иштта дагахь и доьшуш хилч Iаврат дIакъевлина ца хилча хIумма дуй?

Жоп:

БисмиллахIир-рохьманир-рохьим

Ва Iалайкум ассалам ва рохьматуллахIи ва баракатухI!

Ламаз карахь доцуш Къуран деша мега, Къуръанах шех Iотта а ца луш. Мегаш доцург – ламаз карахь доцуш Къуранах Iоттавалар, йа иза схьаиэцар, йа лелор ду. Вуьшта, цунах Iотта а ца луш, ахь хьайн хаттарехь ма-аллара Къуран деша мегар ду, ламаз карахь ца хилча а.

Бакъду, иштта Къуран деша луучуьнан ламаз карахь хилар гIолий лоруш ду. Имам Нававийс – Дала къинхетам бойла цунах – аьлла: "Ламаз эцна а волуш дешар дика ду (Къуран). Ткъа нагахь санна ламаз карахь доцуш дешахь – иза мегаш ду, цу тIехь массо бусалба нехан барт хилла а бу, цу хьокъехь долу хьадисаш дуккха а ду, девзаш а ду. Имамул-Хьарамайн (Ал-Джувайнийс) аьлла: "(Ламаз карахь доцуш дешначо) "макрухI"[1] долу хIума дина эра дац. Муххале а, дича гIолий дерг Iаддитинарг хуьлу иза".[2]

ТIаккха, Къуръан доьшуш хилча Iаврат дIахьулдина хилар билламе хIума дац, важиб долу хIума дац, мелхо а, лелийча дика долу хIума ду, Делаца а, Цуьнан къамелаца а гIиллакхе хилар ду.[3]

Цундела, дIавуьжучу хенахь "Ал-Мулк" сурат доьшуш хилча, йа муьлхха а кхидолу сурат, йа цуьнан цхьа да́къа доьшуш хилча, иза ламаз карахь а доцуш деша мегар ду, шен дагара доьшуш хилчахьана, Къуранах Iотта а ца луш. Iаврат ларалуш йолу дегIан меженаш ерриге дIахьулйина ца хилча а деша мегар ду иза, делахь а хазачу гIиллакхах ду Къуръан доьшучу хенахь хазачу куьцехь хилар.

Ткъа дика хуург сийлахь АллахI ву!

06.11.2009