Хаттар:

Ассаламу Iалайкум! ТахIаджуд ламаз мас даьлча деш ду?
Баркалла хьуна.

Жоп:

БисмиллахIир-рохьманир-рохьим

Ва Iалайкум ассалам ва рохьматуллахIи ва баракатухI!

«ТахIаджуд» бохучу дешан маьIна «вижинчура хьалагIаттар» бохург ду. Ткъа, «тахIаджуд ламаз» - иза вижинчура самаваьлча деш долу ламаз ду, йа вуьшта аьлча, шел хьалха наб йина деш долу ламаз ду иза. Кхин а, «буйьсанна деш долу ламаз» а олу цунах, «буьйсанна гIаьттина деш долу ламаз» а олу цунах. Цигара схьа аьлла Iелам-наха, тахIаджуд ламазан биллам шиъ бу аьлла: набара тIаьхьа хилар а, пхьуьйра ламаз динчул тIаьхьа хилар а.[1] Цунах девза вайна, цуьнан хан пхьуьйра ламаз динчул тIаьхьа дIайолалуш хилар, иза Iуьйра ламазан хан кхаччалц а хилар.[2]

Ткъа цуьнан уггар дика хан муьлхург ю аьлча – цу хьокъехь Имам Нававийс (Дала къинхетам бойла цунах) аьлла:

«Буьйсанна деш долу ме́лан ламаз дезох ду дийнахь дечу ме́лан ламазал.

ТIаккха, буьйсанан шина декъах цхьа дакъа ламаз деш яккха лаахь – шолгIа дакъа дезох ду.

Буьйса кхаа декъе екъа лаахь – юккъера дакъа дезох ду.

Цу шиннал а деза ду буьйса ялх декъе екъа а екъна, цу ялх декъах доьалгIачу а, пхоьалгIачу шина декъехь ламаз дар. Иза шина «Сахьихь» тIехь деана ду иштта».[3]

ТахIаджуд ламаз дан уггар еза а, дика а йолчу ханна вай сахьташца масал далийча, карарчу хенахь Iаьнан хан ю, хIокху хенахь маьркIижа хан хуьлу суьйранна 5 сахьт даьлча, Iуьйра хан хуьлу Iуьйранна 5 сахьт даьлча. Оцу кеппара, буьйсанан хан сахьташкахь лерича 12 сахьт хуьлу. Шийтта сахьт ялх декъе декъча, хIора да́къа шишша сахьт хуьлу (12 ÷ 6 = 2). Оцу ялх декъах хьалхара дакъа ларалуш долу ши сахьт = 5 даьлча 7 даллалц хуьлу, шолгIа дакъа = 7 – 9, кхоалгIа дакъа = 9 – 11, доьалгIа дакъа = 11 – 1, пхоьалгIа дакъа = 1 – 3, ялхолгIа дакъа = 3 – 5. Иштта, тахIаджуд ламаз дарна уггар еза хан йоьалгIаниг а, пхоьалгIаниг а хилча, иза 11 сахьт даьлчахьана 3 сахьт даллалц ерг хуьлу.

Цул тIаьхьа йолчу хенахь Iуьйра ламазан хан хиллалц дIавижча дика ду.

Цу массо хIуманна тешалла ду Пайхамара (Делера салават а, салам а хуьлда цунна) аьлла долу хIара дешнаш: «АллахIана уггар дукха дезаш долу ламаз Давуд-(пайхамаран) ламаз ду: ах буьйсанна наб еш хилла цо, (тIаккха) буьйсанан кхоалгIа дакъа ламаз деш доккхуш хилла цо, (тIаккха) буьйсанан ялхолгIа дакъа (диссича) наб еш хилла цо».[4]

ХIокхунах тера хаттар вай дийцира хьалха кхузахь:

«Буьйсанна 2 даьлча деш долчу ламазах хIун олу хаа лууш вара со».

Ткъа дика хуург сийлахь АллахI ву!

30.11.2009