Хаттар:

Ассаламу Iалайкум! Перз ламаз тIехь вайн маттахь деха ца мега, ткъа суннат ламаз тIехь йа истихарат ламаз тIехь мегий?

Жоп:

БисмиллахIир-рохьманир-рохьим

Ва Iалайкум ассалам ва рохьматуллахIи ва баракатухI!

Суннатехь даьхкина долу доIанаш а, азкараш а ламаз тIехь шен маттахь гочдина дан мегаш дац Iаьрбийн маттахь уьш Iамалуш волчунна. Iаьрбийн маттахь уьш Iамо ницкъ кхочуш воцучунна мегаш ду и доIанаш шаьш ма-дарра гочдина дан. Ткъа, суннатехь деана доцу доIа а, зикр а шен маттахь дан мегаш дац ламаз дечу хенахь, иза дан ца магарехь цхьатера ву Iаьрбийн маттахь иза Iамо ницкъ кхочуш верг а, воцург а. Мегаш доцучу меттехь иштта вай ма-аллара доIа а, зикр а динчуьнан ламаз галдаьлла лоруш ду. Иза вай дийцира хьалха хIокху хаттарехь:

«Перз ламаз тIехь волуш сужудехь нохчийн маттахь доIа дан мега йа ца мега?».

Ткъа цу хIумана тIехь суннат ламазна а, парз ламазна а юкъахь башхула еш ца гина суна шафиIий мазхIабера Iелам-наха. Иза мегаш ду аьллачеран дош а чIогIа дош хиларна, суннат ламаз деш хилча мегаш хила а тарлора аьлла хетаделлера суна цкъа цхьана юкъахь, делахь а, хIинца иза сайггара иштта ала ца хIутту со. Цундела, ламаз тIехь доIа дан луург Iаьрбийн маттахь дан хьажа веза, тIаккха шена шен маттахь шена луург деха лаахь, ламаз дIадерзийначул тIаьхьа дан мегар ду иза, хIунда аьлча парз ламаз дича азкараш дешначул тIаьхьа доIа дар суннат ду, цу доIанехь шена луъург деха мегаш а ду, и доIа шен маттахь дан мегаш а ду, Iаьрбийн мотт ца хуучо шен маттахь дар гIолий хила а тарло иза. Иштта ду истихарат ламаз а – дикачунна тIенисвар доьхуш деш долу доIа и ламаз динчул тIаьхьа деш ду. Ткъа ша́ и доIа ламаз дина ца хилча а дан мегаш ду. Истихарат ламазах лаьцна вай дийцира кхузахь:

«Истихара - ламаз а, доIа а».

Дика хуург сийлахь АллахI ву!

21.11.2009

Жоп карладаккхар:

Ламаз тIехь, Iаьрбийн маттахь а доцуш, шен маттахь доIа дан мегар ду аьлла ду цхьаболчу Iеламнаха. И лакхахь долу жоп вай лучу хенахь, иштта аьлларш буй хаьара вайна, делахь а шафиIий мазхIабехь долчунна тIедоьгIна делла жоп ду иза.

Ткъа, Iаьрбийн мотт ца хууш болу бусалба нах вуно дукха хиларна а, бусалба стаг АллахIана уггар герга хуьлу меттиг сужуд дар хиларна а, цу меттехь доIа дар хьадисашкахь деана долу дела а, цхьаболчу Iеламнаха гочдина доIа дан мегар ду аьлла долу дела а, къаьсттина суннат ламазехь вайн маттахь доIа дар мегаш хир ду аьлла хета суна, Дала мукъа лахь.

Ткъа дика хуург сийлахь АллахI ву!

21.11.2010 = ‏15.12.1431