Хаттар:

Ассаламу Iалайкум!

Сагатдеш хаттарш дара сан: эшаршка ладогIа мегий, нохчийн йа керстачаьрга? Оьзда доцу суьрташка хьежа мегий? Оьзда доцу къамел дан мегий, нохчийн маттахь йа керста маттахь? И яздина долу хIуманаш дича къа летий?
Бехка ца биллар доьха аса цу хаттаршна.
Дела реза хуьлда.

Жоп:

БисмиллахI, алхьамдулиллахI, вассолату вассаламу Iала росулиллахI!

Ва Iалайкум ассалам ва рохьматуллахIи ва баракатухI!

Шайца вон маьIна долуш, йа вон лаамаш меттах бохуш, йа вочу ойланашка вожош, йа иштта и санна долу муьлхха а вон маьIна шайца долуш йолчу эшаршка ладегIар цхьаъа шеко йоцуш хьарам ду. Иштта и вон хIуманаш шайца доцуш йолчу эшарийн хьокъехь, шайн дешнаш а, маьIна а дика долчу эшарийн хьокъехь Iеламнахана юкъахь хилпало ю, тайп-тайпана аьлла дешнаш ду. Хьалха-хьалха дуьйна а, тахана а болчу дукхах болчу Iеламнаха иза мегаш дац аьлла, цара цу хьокъехь цхьацца хьадисаш а, айатийн тафсираш а, асхьабийн дешнаш а даладо, эшаршка ладегIаро Къуръанах вухатуху а олу. Цхьаболчу Iеламнаха иштта эшаршка ладегIар вон хIума дац аьлла, хIунда аьлча билггал иза хьарам деш деана йа айат а, йа – шайна гергахь – нийса хьадис а доцу дела, цхьаболчу асхьабаша а, табиIунаша а иллешка а, эшаршка а ладугIуш хиллера аьлла деана а долу дела.
Ткъа хIара могIанаш яздеш волчунна, оцу шина дашах гIолий хеташ дерг – эшаршка ладегIар дика ца хилар ду, дукхах болчу Iеламнаха аьллачунна тIетовжар ду. Иза вукхул пайдане дерг ду цхьаъа шеко йоцуш, иштта а эрна йойъуш йолу хан эрна ца йайъар а ду, Далла хьалха хIоьттича оцу балхана хаттам ца хилийтарна гIолий дерг а ду.  Делахь а, вукху Iеламнаха аьллачунна тIетевжина цхьамма цхьа хIума лелош делахь, цунах схьадолуш кхин зен а дацахь, цунна дов дар дика хир дац, йа и бахьана долуш цуьнца мостагIалла лацар а дика хир дац. Маггане а мегар дац шайн иджтихIад дарца и хIума мегар ду аьлла болчу Iеламнахана лен а, царна дов дан а, йа церах лаьцна вон ойла кхоллаялийта а.

Хьан вукха шина хаттарна ша-ша даьккхина жоп делла.

Ткъа дика хуург сийлахь АллахI ву!

03.05.2010 = ‏19‏/05‏/1431