Хаттар:

Ассаламу Iалайкум! Сан цхьа хатар дара, суна хезна доьхьара беран дIаяьхна йолу месаш Къуран юккъе ехкича, иман долш хуьлу олу, или книги юккъе дIаехкича хьекъале хуьлу олу и.т.д, и хIуманаш бакъ дуй, лело мегаш дуй? Ларамца Милана.

Жоп:

БисмиллахI, алхьамдулиллахI, вассолату вассаламу Iала росулиллахI!

Ва Iалайкум ассалам ва рохьматуллахIи ва баракатухI!

Бер иман долуш а хир ду, хьекъал долуш а хир ду, дас-нанас иза кхиош хьега ма-дезза къахьегахь. Дукха хьолехь вайн нехан шайн берашца бала ца хуьлу. Цара ишколехь шиъ даьккхича царна дов-м до дас-нанас, делахь а оцу бераца хIора дийнахь цунна хьоьхуш яккха езаш йолу хан ца йоккху, уггар хьалха ас а тIехь. Цхьаболчу (хьекъале болчу) наноша а, дайша а, шайн бераца хIора дийнахь 1-4 сахьт хан йоккху, царна оьшург царна Iамош. Иштта кхуьуш долу бераш ийман долуш а хуьлу (даккхий хилча), хьекъал долуш а хуьлу, массо цхьатера ца хилахь а.

Дала хIокху дуьненахь а, хIокху дахарехь а хIоттийна низам ду, массо хIума цхьацца бахьанца хуьлуьйтуш а ду. Бахьанца хуьлуш доцург пайхамаршна а, эвлаяшна а луш ду, иза а даим дерг дац, церан дахар а «бахьанийн дахар» ду. Бусалба нахана и дахаран Делан низам дицделча, цара бахьанаш лелор Iаддитина, бусалба боцучарна и низам девзича, цара массо агIор бахьанаш лелийна, цундела цара тахана хьалхе яьккхина. Ткъа, месаш книги юкъа яхкар а, йа Къуръан юкъа яхкар а ишттачу бахьанех дуй? «Iилма – Iаморца бен хир дац», аьлла деана ду хьадисехь. Ийман долуш а, хьекъал долуш а бер хилийта лаахь, оцу бераца кхетош-кхиоран болх бан беза, 3 шо кхаьчначу хенахь дуьйна. И бер хецна дитахь, цо «урамера дахар» Iамор ду; оцу берана хезарш-гурш эшарш-ловзарш-синкъерамаш хилахь, цунна Элвис Джексон а, София Королёва а девзар ду, (пайхамарийн а, асхьабийн а, дикчу нехан а, шен къоман турпалхойн а кхачам боллуш ур-атталла цIерш а ца хууш, «эстрадный седарчий» шортта девзаш берш сайна гина дела боху ас иштта); ткъа нагахь санна берана пайденна дерг цунна Iамош дас-нанас къахьегахь (жималлехь къаьсттина ненан декхар алсам ду цигахь), цунна дешаран меттиг уггар диканиг харжахь, цуьнан деша догдоуьйтуш долу массо кепара бахьанаш леладахь, жималлехь дуьйна цунна Къуръан Iамош хилахь, и бер маьждиге дуьгуш, хьуьжаре дуьгуш хилахь, иштта кхидIадолу массо дика цунна хир долу бахьанаш леладахь, и бер ийман долуш а кхуьур ду, хьекъал долуш а кхуьур ду, Дала мукъа лахь.

Цундела, берийн месаш ма йахка Къуръан юккъе а, книги юккъе а. Оцу беран ойла а, хьекъал а оцу Къуръанаца а, книгийца а хилийтар тIехь къахьега, бера кхио ма-дезза кхиорца.

Ткъа дика хуург сийлахь АллахI ву!

22/08/2010 = ‏12‏/09‏/1431