Хаттар:

Ассаламу Iалайкум! КIантана тIера хьакъикъатана, шен хьоле хьаьжна цхьа уьстагI бийнера вайн бусулба вашас, тIакха шолгIа уьстагI бе маца мегар ду цо, шен аьтту хилча, цунна тоьхна хан юй?

Жоп:

БисмиллахIир-рохьманир-рохьим

Ва Iалайкум ассалам ва рохьматуллахIи ва баракатухI!

Iаишата – Дела реза хуьлда цунна – дийцина, Делан Элчано – Делера салават а, салам а хуьлда цунна – шайна омру дира аьлла: «КIантана тIера цхьатерра ши уьстагI бе, йоIана тIера цхьа уьстагI бе».[1] Оцу хьадисехь «цхьатерра» бохучу дешан маьIнех цхьа маьIна цхьаболчу Iелам-наха «цхьаьне буьйш болу шиъ» бохург ду аьлла, йа «цхьатера а болуш, цхьаьне буьйш болу шиъ» бохург ду аьлла.[2]

Цхьаболчу Iелам-наха иштта и аьлла хилар доцург, Iакъикъатана буьйш болу ши уьстагI цхьаьне бен беза аьлла деана хIума дац.

Бакъду, тIаьхьа а ца тоттуш, цхьаьне бийча гIолий лоруш ду.[3]

«Пайхамара (Делера салават а, салам а хуьлда цунна) Хьасанна а, Хьусайнна а тIера (Дела реза хуьлда цаьршинна) ши уьстагI бийра Iакъикъатана» аьлла деанчу хьадисан а, «цо цаьршинна тIера шишша уьстагI бийра» аьлла деанчу хьадисан а маьIна деш, цхьаболчу Iелам-наха аьлла: шена цу дийнахь ши ка бен ца карорна, йа цхьа кхин хIума бахьана долуш тIаьхьатеттича шена дика хетта хиларна, цкъа доьххьара цаьршиннах хIоранна тIера цхьацца уьстагI а бийна, тIаккха шолгIачу дийнахь, йа цхьана кхечу хенахь биссина шиъ тIе бийра цо бохург хила а мега оцу хьадисийн маьIна.

Цундела, нагахь санна шен аьтту белахь, ший а цхьаьне бийча дика ду и шиъ, аьтту бацахь, цхьаъ цхьана хенахь а, важа вукху хенахь а бен мегаш ду, шен аьтту ма-баьлла.[4]

Ткъа оцу хенан чаккхе йолуш хIума дуй аьлча, йа и шолгIаниг берна тоьхна хан юй аьлча – цунах лаьцна хIумма а хьахош суна гина дац. И шиъ цхьана хенахь бер биллам бац аьлла Iелам-наха Iаддитина хиларе хьаьжча, цунна тоьхна хан ца хилар го, цундела, и бер кхиъна да́лале хьалха бийча мегаш хила до́гIу иза, Дала мукъа лахь.

ТIаьххьара, билгалдича дика хир ду: кIантана тIера ши уьстагI бер дика ду, гIолий а ду, мелехь а ду, хIетте а цхьа уьстагI бийча а суннат тIерадолуш ду.

Дика хуург сийлахь АллахI ву!

30.11.2009